ದಾವಣಗೆರೆ: ಅಂತರಾಷ್ಟ್ರೀಯ ಓಲಂಪಿಕ್ ಕಮಿಟಿಯಿಂದ ಮಾನ್ಯತೆ ಪಡೆದ ರಾಷ್ಟ್ರೀಯ ಯುವ ಕ್ರೀಡಾ ಮತ್ತು ಶಿಕ್ಷಣ ಫೆಡರೇಷನ್ ವತಿಯಿಂದ ಫೆಬ್ರವರಿ 26 ಮತ್ತು 27 ರಂದು ಗೋವಾದ ಚೋಗ್ಲೇ ಕ್ರೀಡಾ ಕಾಲೇಜಿನಲ್ಲಿ ನಡೆದ 6 ನೇ ರಾಷ್ಟ್ರೀಯ ಯುವ ಕ್ರೀಡಾ ಚಾಂಪಿಯನ್ಶಿಪ್ 2022 ರಲ್ಲಿ ನಗರದ ಈಗಲ್ ಫಿಟ್ನೆಸ್ನ ವಿದ್ಯಾರ್ಥಿಗಳು ಬಾಕ್ಸಿಂಗ್ ವಿಭಾಗದಲ್ಲಿ ತಲಾ ಎರಡು ಚಿನ್ನ , ಬೆಳ್ಳಿ ಪದಕ ಪಡೆದು ದಾವಣಗೆರೆ ಜಿಲ್ಲೆಗೆ ಕೀರ್ತಿ ತಂದು ಕೊಟ್ಟಿದ್ದಾರೆ. ಈ ಗೆಲುವನ್ನು ‘ಪುನೀತ್ ರಾಜ್ಕುಮಾರ್’ ಅವರಿಗೆ ಅರ್ಪಿಸಿದ್ದಾರೆ.
71- 75 ಕೆ.ಜಿ. ವಿಭಾಗದಲ್ಲಿ ಮಲ್ಲಿಕಾರ್ಜುನ್ 30 ಪಾಯಿಂಟ್ ಮತ್ತು 61-65 ಕೆ.ಜಿ. ವಿಭಾಗದಲ್ಲಿ ದೀಕ್ಷಿತ್ ಎಂ.ಎಲ್ 29 ಪಾಯಿಂಟ್ಗಳನ್ನು ಪಡೆದು ಚಿನ್ನದ ಪದಕಕ್ಕೆ ಭಾಜನರಾಗಿದ್ದಾರೆ. 76-80 ಕೆ.ಜಿ. ವಿಭಾಗದಲ್ಲಿ ರಾಮ್ಕುಮಾರ್ 24 ಪಾಯಿಂಟ್ ಹಾಗೂ 51-55 ಕೆ.ಜಿ. ವಿಭಾಗದಲ್ಲಿ ಚಿನ್ನು ವಿಕಾಸ್ 22 ಪಾಯಿಂಟ್ ಪಡೆದು ಬೆಳ್ಳಿ ಪದಕಕ್ಕೆ ಭಾಜನರಾಗಿರುತ್ತಾರೆ. ಈ ಸಾಧನೆ ಮಾಡಿದ ವಿದ್ಯಾರ್ಥಿಗಳಿಗೆ ಈಗಲ್ ಫಿಟ್ನೆಸ್ನ ತರಬೇತುದಾರರಾದ ವೆಂಕಿ ಸೆನ್ಸೈ ಮತ್ತು ದಾವಣಗೆರೆಯ ಕ್ರೀಡಾ ಪ್ರೋತ್ಸಾಹಕರಾದ ಶ್ರೀನಿವಾಸ ದಾಸಕರಿಯಪ್ಪ ಹಾಗೂ ಮಾಜಿ ಮೇಯರ್ ಬಿ.ಜಿ. ಅಜಯ್ಕುಮಾರ್ ಅಭಿನಂದಿಸಿದ್ದಾರೆ.
