ಹೊಸದಿಲ್ಲಿ: ಹೊಸವರ್ಷ 2020 ಸಂಭ್ರಮದ ಮುನ್ನದಿನ ಕೇಂದ್ರ ಸರ್ಕಾರ ರೈಲು ಪ್ರಯಾಣಿಕರಿಗೆ ಶಾಕ್ ನೀಡಿದ್ದು, ರೈಲ್ವೆ ಸೇವೆಗಳ ಶುಲ್ಕ ಹೆಚ್ಚಳ ಮಾಡಿದೆ. ಉಪ ನಗರ ರೈಲ್ವೆ ಸೇವೆಗಳ ಶುಲ್ಕ ಹೊರತುಪಡಿಸಿ ಉಳಿದ ಶುಲ್ಕಗಳು ಇಂದಿನಿಂದಲೇ ಹೆಚ್ಚಳವಾಗಲಿದೆ.
ರೈಲ್ವೆ ಇಲಾಖೆ ಮಂಗಳವಾರ ರಾತ್ರಿ ಈ ಆದೇಶ ಹೊರಡಿಸಿದೆ. ಸಾಮಾನ್ಯ, ಹವಾನಿಯಂತ್ರಿತೇತರ ರೈಲು ದರಗಳು ಪ್ರತಿ ಕಿಲೋ ಮೀಟರ್ ಪ್ರಯಾಣಕ್ಕೆ 1 ಪೈಸೆ ಏರಿಕೆಯಾಗಲಿದೆ. ಮೇಲ್, ಎಕ್ಸ್ಪ್ರೆಸ್, ಎಸಿ ರೈಲುಗಳಲ್ಲಿ ಪ್ರಯಾಣ ದರ 2 ಪೈಸೆ, ಹವಾನಿಯಂತ್ರಿತ ರೈಲುಗಳಲ್ಲಿ ಪ್ರತಿ ಕಿಲೋ ಮೀಟರ್ಗೆ 4 ಪೈಸೆ ಏರಿಕೆಯಾಗಲಿದೆ.
ಶತಾಬ್ಧಿ, ರಾಜಧಾನಿ, ತುರಂತ್ ರೈಲುಗಳ ಸೇವಾ ಶುಲ್ಕವೂ ಹೆಚ್ಚಾಗಲಿದೆ. ಮುಂಗಡ ಟಿಕೆಟ್ ಮತ್ತು ಸೂಪರ್ ಫಾಸ್ಟ್ ಶುಲ್ಕದಲ್ಲಿ ಯಾವುದೇ ಬದಲಾವಣೆ ಇಲ್ಲ ಎಂದು ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
