ದಾವಣಗೆರೆ: ಮಳೆಗಾಲ ಮುಗಿದು ಬೇಸಿಗೆ ಪ್ರಾರಂಭವಾದ ಹಿನ್ನಲೆ ರೈತರು, ನೀರಿಗಾಗಿ ಬೋರ್ ವೆಲ್ ಅವಲಂಬನೆ ಹೆಚ್ಚಾಗಿದೆ. ಇಲ್ಲೊಬ್ಬ ರೈತ ಎಂದಿನಂತೆ ಬೆಳೆಗಳಿಗೆ ನೀರು ಹಾಯಿಸಲು ಬೋರ್ ವೆಲ್ ಆನ್ ಮಾಡಿದ್ದಾನೆ. ಆದರೆ, ರನ್ನಿಂಗ್ ನಲ್ಲಿದ್ದ ಬೋರ್ ನೋಡ ನೋಡುತ್ತಿದ್ದಂತೆಯೇ ನೆಲಕ್ಕೆ ಕುಸಿದಿದೆ. ಈ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿದೆ.
ಈ ಘಟನೆ ನಡೆದಿರುವುದು ಜಗಳೂರು ತಾಲೂಕಿನ ರಸ್ತೆ ಮಾಕುಂಟೆ ಗ್ರಾಮದಲ್ಲಿ. ಗ್ರಾಮದ ರೈತ ಪರಮೇಶ್ವರ್ ಕಳೆದ ಒಂದು ವರ್ಷದ ಹಿಂದೆ ತಮ್ಮ ಜಮೀನಿನಲ್ಲಿ ಬೋರ್ವೆಲ್ ಕೊರೆಸಿದ್ದರು. ಮೊದಲು ಒಂದು ತಿಂಗಳು ಚೆನ್ನಾಗಿಯೇ ನೀರು ಬಂದಿದ್ದು, ಬಳಿಕ ನೀರು ಬರದಿದ್ದಾಗ ಪೈಪ್ ಹಾಗೂ ಪಂಪ್ ಮೇಲಕ್ಕೆತ್ತಿ ಮನೆಯಲ್ಲಿಟ್ಟಿದ್ದರು. ಈ ವರ್ಷ ಉತ್ತಮ ಮಳೆಯಾಗುತ್ತಿರುವುದರಿಂದ ಅಂತರ್ಜಲ ಪ್ರಮಾಣದಲ್ಲಿ ಹೆಚ್ಚಳವಾಗಿದೆ.
ಪರಮೇಶ್ವರ್ ಅಕ್ಕಪಕ್ಕದ ಜಮೀನುಗಳಲ್ಲಿನ ಬೋರ್ವೆಲ್ಗಳಲ್ಲಿ ನೀರು ಹೆಚ್ಚಿನ ಪ್ರಮಾಣದಲ್ಲಿ ಬರುತ್ತಿರುವುದನ್ನು ಕಂಡು, ನಮ್ಮ ಜಮೀನಿನಲ್ಲಿರುವ ಬೋರ್ವೆಲ್ಗೆ ಪಂಪ್ ಇಳಿಸಿ ಆನ್ ಮಾಡಿದ್ದಾನೆ. ಈ ವೇಳೆ ಎರಡು ಇಂಚಿನ ಪೈಪ್ ನಲ್ಲಿ ಫುಲ್ ನೀರು ಬಂದಿದೆ. ಇದೇ ಖುಷಿಯಲ್ಲಿ ಮೊಬೈಲ್ನಲ್ಲಿ ವಿಡಿಯೊ ರೆಕಾರ್ಡ್ ಮಾಡಿಕೊಳ್ಳತ್ತಿದ್ದಾಗ ನೋಡ ನೋಡುತ್ತಿದ್ದಂತೆ ರನ್ನಿಂಗ್ ನಲ್ಲಿದ್ದ ಬೋರ್ ವೆಲ್ ನೆಲಕ್ಕೆ ಕುಸಿದಿದೆ. ಭರ್ಜರಿ ನೀರಿದ್ದರೂ ಕೆಲವೇ ಸೆಕೆಂಡಿನಲ್ಲಿ ಆ ಖುಷಿ ಮರೆಯಾಗಿ ಬೋರ್ವೆಲ್ ಕುಸಿದು ಬಿದ್ದಿದೆ.
ಸಿಗದ ಗಟ್ಟಿ ದಡ; ಬೋರ್ ಕೊರೆಸಿದ ಮೇಲೆ ಗಟ್ಟಿಯಾದ ದಡ ಸಿಗುವರೆಗೆ ಕೇಸಿಂಗ್ ಪೈಪ್ ಹಾಕದೇ ಇದ್ದಾಗ ಇಂತಹ ಅವಘಡ ಸಂಭವಿಸುತ್ತವೆ. ಆದರೆ, ರೈತ ಪರಮೇಶ್ವರ್ ತಾವು ಕೇಸಿಂಗ್ ಪೈಪ್ ಹಾಕಿದ್ದಾಗಿ ತಿಳಿಸಿದ್ದಾರೆ. ಆದರೆ, ಬೋರ್ವೆಲ್ ಕುಸಿಯಲು ಸ್ಪಷ್ಟವಾದ ಕಾರಣ ತಿಳಿದು ಬಂದಿಲ್ಲ.
