ದಾವಣಗೆರೆ: ತಾಲ್ಲೂಕಿನ ಅಣಜಿ ಕೆರೆ ಕೋಡಿ ಬಿದ್ದ ಕಾರಣ ಕೆರೆಯಾಗಲಹಳ್ಳಿಯ ಕೋಳಿ ಫಾರ್ಮ್ ಒಂದಕ್ಕೆ ಮಳೆ ನೀರು ನುಗ್ಗಿದ್ದು, 8 ಸಾವಿರ ಕೋಳಿ ಮರಿಗಳು ಸಾವನ್ನಪ್ಪಿದ ಘಟನೆ ನಡೆದಿದೆ.
ಕೋಳಿ ಫಾರ್ಮ್ ಜಲಾವೃತಗೊಂಡಿದ್ದು, ಫಾರ್ಮ್ ಮಾಲೀಕರಿಗೆ ಲಕ್ಷಾಂತರ ರೂ ನಷ್ಟ ಉಂಟಾಗಿದೆ. ಭಾರೀ ಮಳೆಗೆ ಸಾವಿರಾರು ಕೋಳಿಗಳು ಸಾವನಪ್ಪಿವೆ.ಜಿಲ್ಲೆಯಲ್ಲಿ ಕಳೆದ ಎರಡ್ಮೂರು ದಿನಗಳಿಂದ ನಿರಂತರವಾಗಿ ಮಳೆಯಾಗುತ್ತಿದೆ. ಮಹಾಮಳೆಗೆ ಅಣಜಿ ಕೆರೆ ಉಕ್ಕಿ ಹರಿಯುತ್ತಿದೆ. ಇದರಿಂದ ಕೆರೆಯಾಗಲಹಳ್ಳಿಯ ಸುತ್ತಮುತ್ತಲಿನ ಜಮೀನುಗಳಿಗೆ ನೀರು ನುಗ್ಗಿದೆ.
ಕೆರೆಯಾಗಲಹಳ್ಳಿಯ ರಂಗಪ್ಪ ಎನ್ನುವವರ ಕೋಳಿ ಫಾರ್ಮ್ ಗೆ ನೀರು ನುಗ್ಗಿದ್ದು, 8000 ಕೋಳಿಗಳು ಸಾವನಪ್ಪಿವೆ. ಮಾಲೀಕ ರಂಗಪ್ಪ ಅವರು ಒಬ್ಬರೇ ಕೋಳಿ ಫಾರ್ಮ್ ನಲ್ಲಿದ್ದರಿಂದ ಕೋಳಿಗಳನ್ನು ಉಳಿಸಿಕೊಳ್ಳಲು ಆಗಲಿಲ್ಲ, ಇದರಿಂದ ರಂಗಪ್ಪ ಅವರಿಗೆ ಸುಮಾರು ಲಕ್ಷಾಂತರ ರೂ ನಷ್ಟ ಉಂಟಾಗಿದೆ ಎಂದು ಅಂದಾಜಿಸಲಾಗಿದೆ. ರಾತ್ರಿ 10 ಗಂಟೆ ಸುಮಾರಿಗೆ ಏಕಾಏಕಿ ಮಳೆ ನೀರು ಫಾರ್ಮ್ ಗೆ ನುಗ್ಗಿದ್ದರಿಂದ ಏನೂ ಮಾಡಲಾಗಲಿಲ್ಲ. ಕುಕ್ಕುಟೋದ್ಯಮವನ್ನು ನಂಬಿ ಜೀವನ ಸಾಗಿಸುತ್ತಿರುವ ರಂಗಪ್ಪನವರಿಗೆ ದೊಡ್ಡ ಮಟ್ಟದಲ್ಲಿ ನಷ್ಟ ಉಂಟಾಗಿರುವುದರಿಂದ, ಸಂಬಂಧಪಟ್ಟ ಅಧಿಕಾರಿಗಳು ಪರಿಹಾರ ಒದಗಿಸಕೊಡಬೇಕೆಂದು ಆಗ್ರಹಿಸಿದ್ದಾರೆ
