ವಾಷಿಂಗ್ಟನ್: ಔಷಧಿ ರಫ್ತು ನಿಷೇಧಕ್ಕೆ ಭಾರತಕ್ಕೆ ಪ್ರತೀಕಾರದ ಬೆದರಿಕೆ ಹಾಕಿದ್ದ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಇಂದು ಯುಟರ್ನ್ ಹೊಡೆದಿದ್ದು ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಕೊಂಡಾಡಿದ್ದಾರೆ.
ಹೈಡ್ರಾಕ್ಸಿಕ್ಲೋರೋಕ್ವಿನ್ ಸೇರಿದಂತೆ ವಿವಿಧ 24 ಬಗೆಯ ಔಷಧಿಗಳು ಅಮೆರಿಕಕ್ಕೆ ರಫ್ತಾಗಿರುವ ವಿಷಯ ತಿಳಿಯುತ್ತಿದ್ದಂತೆ ಡೊನಾಲ್ಡ್ ಟ್ರಂಪ್ ಮೋದಿಯವರನ್ನು ಹೊಗಳಿದ್ದಾರೆ. ಒಟ್ಟು 2.9ಕೋಟಿ ಔಷಧಿಯ ಡೊಸೇಜ್ ರಫ್ತಾಗಿದ್ದು ಅಮೆರಿಕ ತಲುಪಲಿದೆ.
ಅಮೆರಿಕದಲ್ಲಿ ಕೊರೊನಾ ಮಹಾಮಾರಿಗೆ ಇಲ್ಲಿಯವರೆಗೂ 4 ಲಕ್ಷ ಜನರು ಸೋಂಕಿಗೆ ತುತ್ತಾಗಿದ್ದು , 13 ಸಾವಿರ ಜನರು ಮೃತಪಟ್ಟಿದ್ದಾರೆ. ಟ್ರಂಪ್ ಸರ್ಕಾರ ಸೋಂಕಿತರಿಗೆ ಹೈಡ್ರಾಕ್ಸಿಕ್ಲೋರೋಕ್ವಿನ್ ಔಷಧಿ ನೀಡಲು ಸೂಚಿಸಿದೆ. ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರೊಂದಿಗೆ ಮಾತನಾಡಿ ಇಷ್ಟು ಪ್ರಮಾಣದ ಔಷಧಿಯನ್ನು ತರಿಸಿದ್ದೇನೆ. ಮೋದಿ ಒಳ್ಳೆಯವರು, ಅವರು ತುಂಬಾ ಗ್ರೇಟ್ ಎಂದಿದ್ದಾರೆ.
ಸೋಮವಾರವಷ್ಟೇ ಭಾರತ ತನ್ನ ರಫ್ತು ನಿಷೇಧ ನಿಲುವು ಸಡಿಲಿಸಿ ಹೈಡ್ರಾಕ್ಸಿಕ್ಲೋರೋಕ್ವಿನ್ ಔಷಧಿಯನ್ನು ರಫ್ತು ಮಾಡಬೇಕು, ಇಲ್ಲವಾದಲ್ಲಿ ವಾಣಿಜ್ಯ ಪ್ರತೀಕಾರವನ್ನು ಎದುರಿಸಬೇಕಾಗುತ್ತದೆ ಎಂದು ಹೇಳಿದ್ದರು.ಭಾರತ ಈ ಸಹಾಯ ಮಾಡಿದ ಹಿನ್ನೆಲೆ ಇದೀಗ ಟ್ರಂಪ್ ಹೊಗಳಿದ್ದಾರೆ.
