ನವದೆಹಲಿ: ಹೊಸದಾಗಿ ಎಲ್‌ಪಿಜಿ ಸಿಲಿಂಡರ್ ಸಂಪರ್ಕ ಪಡೆಯುವ ದರ ಇಂದಿನಿಂದಲೇ 750 ರೂಪಾಯಿ ಏರಿಕೆಯಾಗಿದೆ. ಇಂಧನ ಮಾರುಕಟ್ಟೆ ಕಂಪೆನಿಗಳು (ಒಎಂಸಿಗಳು) ಹೊಸ ಸಿಲಿಂಡರ್‌ಗಳ ಭದ್ರತಾ ಶುಲ್ಕ ಹೆಚ್ಚಿಸಿರುವುದರಿಂದ ಈ ಮೊತ್ತ ಹೆಚ್ಚಿಸಲಾಗಿದೆ.
ಸಿಂಗಲ್‌, ಡಬಲ್‌ ಎರಡೂ ಹೆಚ್ಚಳ: ಹೊಸ ಸಿಂಗಲ್‌ ಸಿಲಿಂಡರ್ ಸಂಪರ್ಕಕ್ಕೆ 1,450 ರೂ. ನೀಡಬೇಕಾಗಿತ್ತು. ಇನ್ನು ಹೆಚ್ಚುವರಿ 750 ರೂ. ಪಾವತಿಸಬೇಕಾಗಿರುವುದರಿಂದ ಇದು 2,200 ರೂ.ಗಳಿಗೇರುತ್ತದೆ. ಇನ್ನು, 14.2 ಕೆಜಿ ತೂಕದ ಎರಡು ಸಿಲಿಂಡರ್‌ಗಳ ಸಂಪರ್ಕ ಪಡೆದುಕೊಳ್ಳಲು ಬಯಸುವುದಾದರೆ ಹೆಚ್ಚುವರಿಯಾಗಿ 1,500 ರೂ. ನೀಡಬೇಕಾಗುತ್ತದೆ. ಅಲ್ಲಿಗೆ ಒಟ್ಟಾರೆ ಹೊಸ ಸಂಪರ್ಕದ ಮೊತ್ತ 4,400 ರೂ. ಕಟ್ಟಬೇಕು.
ಇನ್ನು ರೆಗ್ಯುಲೇಟರ್‌ ದರ ಕೂಡ ಹೆಚ್ಚಳವಾಗಿದ್ದು 150 ರೂಪಾಯಿಂದ 250 ರೂ.ಗೆ ಹೆಚ್ಚಳವಾಗಿದೆ. ಇದರ ಮಧ್ಯೆ 5 ಕೆಜಿ ಸಿಲಿಂಡರ್ ಬೇಕೆಂದರೆ ಅದಕ್ಕೆ ಭದ್ರತಾ ಮೊತ್ತವಾಗಿ ಒಂದಕ್ಕೆ 1,150 ರೂ. ನೀಡಬೇಕಾಗುತ್ತದೆ. ಈ ಹಿಂದೆ ಅದರ ಮೊತ್ತ 800 ರೂ. ಇತ್ತು. ಸಿಲಿಂಡರ್‌ನಿಂದ ಸ್ಟವ್‌ಗೆ ಸಂಪರ್ಕ ಒದಗಿಸುವ ಪೈಪ್‌ಗೆ 150 ರೂ. ಹಾಗೂ ಅನಿಲ ಸಂಪರ್ಕದ ಪಾಸ್‌ಬುಕ್‌ಗೆ 25 ರೂ. ನೀಡಬೇಕಾಗುತ್ತದೆ.
