ದಾವಣಗೆರೆ: ಅಕ್ರಮವಾಗಿ ಮೀಸಲು ಅರಣ್ಯ ಪ್ರದೇಶಿಸಿ ಕಾಡುಪ್ರಾಣಿ ಬೇಟೆ ನಡೆಸಿದ ಆರೋಪಿಯನ್ನು ಅರಣ್ಯ ಇಲಾಖೆ ಅಧಿಕಾರಿಗಳು ಬಂಧನ ಮಾಡಿದ್ದಾರೆ. ಆರೋಪಿಯಿಂದ ಜಿಂಕೆ ಚರ್ಮ, ಒಙದು ನಾಡ ಬಂದೂಕು ಮತ್ತು ಬೈಕ್‌ ವಶಕ್ಕೆ ಪಡೆಯಲಾಗಿದೆ.
ಜಿಲ್ಲೆಯ ನ್ಯಾಮತಿ ತಾಲ್ಲೂಕಿನ ಕುದುರೆಕೊಂಡ ರಾಜ್ಯ ಮೀಸಲು ಅರಣ್ಯ ಪ್ರದೇಶದಲ್ಲಿ ಆರೋಪಿಯನ್ನು ಬಂಧಿಸಲಾಗಿದೆ. ಚಿನ್ನಿಕಟ್ಟೆ ತಮಿಳು ಕಾಲೊನಿಯ ಮೋಹನ ಬಂಧಿತ ಆರೋಪಿ. ಚಿನ್ನಿಕಟ್ಟೆಯ ಶಿವಕುಮಾರ, ದಿನೇಶ, ವಡವೇಲು ನಾಪತ್ತೆಯಾಗಿದ್ದಾರೆ.
ಬಿದರಹಳ್ಳಿಯ ಕುದುರೆಕೊಂಡ ಮೀಸಲು ಅರಣ್ಯ ಪ್ರದೇಶದಲ್ಲಿ ಅನಧಿಕೃತವಾಗಿ ನಾಡಬಂದೂಕು ಹಿಡಿದು ಅಕ್ರಮವಾಗಿ ಅರಣ್ಯ ಪ್ರವೇಶ ಮಾಡಿದ್ದ ಆರೋಪಿಯಿಂದ ಚುಕ್ಕೆ ಜಿಂಕೆಯ ಸುಲಿದ ಹಸಿ ಚರ್ಮ, ಒಂದು ನಾಡ ಬಂದೂಕು, ಬೈಕ್‌ ವಶಪಡಿಸಿಕೊಂಡಿದ್ದು, 12 ದಿನ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.
ಡಿಸಿಎಫ್ ಜಿ.ಆರ್. ಶಶಿಧರ ಮತ್ತು ಎಸಿಎಫ್ ಭಾಗ್ಯಲಕ್ಷ್ಮಿ ಅವರ ಮಾರ್ಗದರ್ಶನದಲ್ಲಿ ವಲಯ ಅರಣ್ಯಾಧಿಕಾರಿ ಒ.ಕಿಶೋರನಾಯ್ಕ ನೇತೃತ್ವದಲ್ಲಿ ಉಪವಲಯ ಅರಣ್ಯಾಧಿಕಾರಿಗಳಾದ ಬರ್ಕತ್‌ ಅಲಿ, ಎಂ.ಬಿ.ಶಿವಯೋಗಿ, ಜಿ.ಜಿ.ಹಸನ್ ಭಾಷ ಮತ್ತು ಗಸ್ತು ಅರಣ್ಯಪಾಲಕರಾದ ನಾಗಲಿಂಗಪ್ಪ, ಎಚ್.ಬಿ.ಅಂಜಲಿ, ಓ.ಪ್ರಭಾಕರ, ಎಚ್.ಬಿ. ಆಶಾ, ಸಿಬ್ಬಂದಿ ಎಂ.ಪಿ.ಬಸವರಾಜಪ್ಪ, ಪ್ರವೀಣ, ಸುನೀಲ, ಪ್ರದೀಪ, ರಮೇಶ, ಮೌನೇಶಿ ಕಾರ್ಯಾಚರಣೆಯಲ್ಲಿ ಭಾಗಿಯಾಗಿದ್ದರು.
