ಹಳೇ ಕುಂದುವಾಡ ಬಳಿ ಹೊಸ ಬಡಾವಣೆ ನಿರ್ಮಾಣಕ್ಕೆ ರೈತರಿಂದ ಜಮೀನು ಖರೀದಿಸಲು ಸಚಿವ ಸಂಪುಟ ಒಪ್ಪಿಗೆ

ದಾವಣಗೆರೆ: ದಾವಣಗೆರೆ- ಹರಿಹರ ನಗರಾಭಿವೃದ್ಧಿ ಪ್ರಾಧಿಕಾರದಿಂದ (ದೂಢಾ) ನಗರದ ಹೊರ ವಲಯದ ಹಳೇ ಕುಂದುವಾಡ ಬಳಿ ಅಭಿವೃದ್ಧಿಪಡಿಸಲು ಉದ್ದೇಶಿಸಿರುವ ಹೊಸ ಬಡಾವಣೆಗೆ ರೈತರಿಂದ ಜಮೀನು ಖರೀದಿಸಲು ಸಚಿವ ಸಂಪುಟ ಸಭೆ ಒಪ್ಪಿಗೆ ಸೂಚಿಸಿದೆ.

ಹಳೇ ಕುಂದುವಾಡದ 45 ರೈತರಿಂದ 52 ಎಕೆರೆ ಜಮೀನು ಖರೀದಿಸಲು ಒಪ್ಪಿಗೆ ಸೂಚಿಸಲಾಗಿದೆ. ಪ್ರತಿ ಎಕರೆಗೆ 1.38 ಕೋಟಿ ರೂಪಾಯಿಗೆ ರೈತರಿಗೆ ಕೊಡಲು ನಿರ್ಧರಿಸಲಾಗಿದೆ. ನಿನ್ನೆ ನಡೆದ ಸುಂಪುಟ ಸಭೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಸರ್ಕಾರದಿಂದ ಆದೇಶ ಪತ್ರ ಬಂದ ನಂತರ ರೈತರ ಜಮೀನು ಖರೀದಿಸಲಾಗುವುದು ಎಂದು ದೂಢಾ ಅಧ್ಯಕ್ಷ ಕೆ.ಎಂ.‌ಸುರೇಶ್ ತಿಳಿಸಿದ್ದಾರೆ.

ಈ ಹಿಂದೆ 1.18 ಕೋಟಿ ರೂಪಾಯಿಗೆ ಪ್ರತಿ ಎಕರೆಗೆ ದರ ನಿಗದಿ ಮಾಡಲಾಗಿತ್ತು. ಇದಕ್ಕೆ ರೈತರು ಒಪ್ಪಿಗೆ ನೀಡಿರಲಿಲ್ಲ, ನಂತರ ಜಿಲ್ಲಾಧಿಕಾರಿ ಸಮ್ಮುಖದಲ್ಲಿ ಪ್ರತಿ ಎಕರೆಗೆ 1.28 ಕೋಟಿ ಹಾಗೂ ಒಂದು ನಿವೇಶನ ನೀಡುವ ಭರವಸೆ ನೀಡಲಾಗಿತ್ತು. ಇದಾದ ನಂತರ ಮತ್ತೆ ಹಳೇ ಕುಂದುವಾಡ ರೈತರು ನಮ್ಮ ಜಮೀನು ಕೊಡುವುದಿಲ್ಲ ಎಂದು ದೂಢಾಗೆ ಮನವಿ ಸಲ್ಲಿಸಿದ್ದರು. ಇದೀಗ ಸರ್ಕಾರ ಎಕೆರೆಗೆ 1. 38 ಕೋಟಿ ದರ ನಿಗದಿ ಮಾಡಿದ್ದು, ಜಮೀನು ಮಾಲೀಕರಿಗೆ ಯಾವುದೇ ನಿವೇಶ ಕೊಡುವುದಿಲ್ಲ.