ದಾವಣಗೆರೆ: ಕಲ್ಯಾಣ ಮಂಟಪ ಟಾರ್ಗೆಟ್ ಮಾಡಿ ಕಳ್ಳತನ; ಇಬ್ಬರು ಆರೋಪಿಗಳ ಬಂಧನ- ಬರೋಬ್ಬರಿ 7.83 ಲಕ್ಷ ಮೌಲ್ಯದ ಸ್ವತ್ತು ವಶ

ದಾವಣಗೆರೆ: ಕಲ್ಯಾಣ ಮಂಟಪ‌ ಟಾರ್ಗೆಟ್ ಮಾಡಿ ಕಳ್ಳತನ ಮಾಡುತ್ತಿದ್ದ ಇಬ್ಬರು ಆರೋಪಿಗಳನ್ನು ಜಿಲ್ಲಾ ಪೊಲೀಸರು ಬಂಧನ ಮಾಡಿದ್ದು, ಆರೋಪಿಗಳಿಂದ ಒಟ್ಟು 7.83.000/- ರೂ ಮೌಲ್ಯದ ಬಂಗಾರ, ಬೆಳ್ಳಿ ಆಭರಣ, ನಗದು ಹಣ ವಶಪಡಿಸಿಕೊಳ್ಳಲಾಗಿದೆ.

ದಿನಾಂಕ-26/10/2024 ರಂದು ಪ್ರಕರಣದ ದೂರುದಾರರಾದ ಕೌಶಿಕ್ ಬಿ.ಆರ್  ಬಡಾವಣೆ ಪೊಲೀಸ್ ಠಾಣೆಗೆ ಹಾಜರಾಗಿ ದೂರು ನೀಡಿದ್ದರು.  ದಿನಾಂಕ-27/10/2024 ರಂದು ಮದುವೆ ಸಮಾರಂಭ ಇರುವ ಪ್ರಯುಕ್ತ ದಾವಣಗೆರೆಯ ನಿಜಲಿಂಗಪ್ಪ ಬಡಾವಣೆಯಲ್ಲಿರುವ ಶ್ರೀ ಬಕ್ಕೇಶ್ವರ ಕಲ್ಯಾಣ ಮಂಟಪಕ್ಕೆ ಆಗಮಿಸಿದ್ದೇವು. ಮದುವೆ ಸಮಾರಂಭದ ರಾತ್ರಿ ದಿನಾಂಕ-26/10/2024 ರಂದು ರಾತ್ರಿ ಕಲ್ಯಾಣ ಮಂಟಪದ ಮೊದಲು ಮಹಡಿ ರೂಮ್ ನಲ್ಲಿ ಇರಿಸಿದ್ದ ಬ್ಯಾಗಿನಲ್ಲಿದ್ದ ಸುಮಾರು 73 ಗ್ರಾಂ ತೂಕದ 1) ಎರಡು ಎಳೆಯ ಮಾಂಗಲ್ಯ ಸರ 2) ಒಂದು ಎಳೆಯ ಚೈನ್ 3) ಒಂದು ಜೊತೆ ಚಿಕ್ಕ ಜುಮುಕಿ ಒಡವೆಗಳನ್ನು ಯಾರೋ ಕಳ್ಳರು ಕಳವು ಮಾಡಿಕೊಂಡು ಹೋಗಿರುತ್ತಾರೆ ಎಂದು ದೂರು ನೀಡಿದ್ದರು.

• ಕಲ್ಯಾಣ ಮಂಟಪ‌ ಟಾರ್ಗೆಟ್ ಮಾಡಿ ಕಳ್ಳತನ
• ಬಡಾವಣೆ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ಕೃತ್ಯ
• ಮಸಾಲೆ ವ್ಯಾಪಾರಿಗಳ ಕೈಚಳಕ
• ಒಟ್ಟು 7.83.000 ರೂ. ಮೌಲ್ಯದ ಸ್ವತ್ತು ವಶ‌

ಈ ದೂರಿನ ಅನ್ವಯ ಹೆಚ್ಚುವರಿ ಪೊಲೀಸ್ ಅಧೀಕ್ಷಕ ವಿಜಯಕುಮಾರ್ ಎಂ. ಸಂತೋಷ್ , ಮಂಜುನಾಥ್ ಜಿ ಮಾರ್ಗದರ್ಶನದಲ್ಲಿ ಹಾಗೂ ಡಿವೈಎಸ್ಪಿ ಮಲ್ಲೇಶ್ ದೊಡ್ಡಮನಿ ನೇತೃತ್ವದಲ್ಲಿ ಆರೋಪಿಗಳ ಪತ್ತೆ ಮಾಡಲು ಬಡಾವಣೆ ಪೊಲೀಸ್ ಠಾಣೆಯ ಪೊಲೀಸ್ ಇನ್ ಸ್ಪೆಕ್ಟರ್ ಎಂ.ಆರ್ ಚೌಬೆ ನೇತೃತ್ವದ ತಂಡ ಆರೋಪಿಗಳ ಪತ್ತೆ ಮಾಡಿದೆ.

ಮಸಾಲೆ ವ್ಯಾಪಾರಿಗಳ ಕೈಚಳಕ: ಪದೇ ಪದೇ ಕಲ್ಯಾಣ ಮಂಟಪಗಳಲ್ಲೇ ಕಳ್ಳತನ ಮಾಡುತ್ತಿದ್ದ ಆರೋಪಿಗಳ ಬಗ್ಗೆ ಸುಳಿವು ದೊರೆತಿದ್ದು, ಈ ತಂಡವು ಕಾರ್ಯ ಪ್ರವೃತ್ತರಾಗಿ ಆರೋಪಿಗಳಾದ ಎ-1 ಕಿರಣ್ ನಾಯ್ಕ್ ತಂದೆ ರಾಜಾ ನಾಯ್ಕ್ (25) ಮಸಾಲೆ ವ್ಯಾಪಾರ ವಾಸ: ಶಾಂತಿನಗರ, ರಿಂಗ್ ರಸ್ತೆ ದಾವಣಗೆರೆ ಮತ್ತು ಎ-2 ವಿನೋದ್ ನಾಯ್ಕ್ (23), ಮಸಾಲೆ ವ್ಯಾಪಾರ ವಾಸ: ಶಾಂತಿನಗರ, ರಿಂಗ್ ರಸ್ತೆ ದಾವಣಗೆರೆ ಇವರನ್ನು ಬಂಧನ ಮಾಡಲಾಗಿದೆ.

7.83 ಲಕ್ಷ ಮೌಲ್ಯದ ಸ್ವತ್ತು ವಶ: ಆರೋಪಿಗಳಿಂದ ಕಳ್ಳತನ ಮಾಡಿದ್ದ ಅಂದಾಜು 5,32,000/- ರೂ ಮೌಲ್ಯದ ಸುಮಾರು 80 ಗ್ರಾಂ ತೂಕದ 1)ಎರಡು ಎಳೆ ಬಂಗಾರದ ಮಾಂಗಲ್ಯ ಸರ 2) ಒಂದು ಎಳೆ ಬಂಗಾರದ ಚೈನ್, 3) ಒಂದು ಜೊತೆ ಜುಮುಕಿ, ಕಳವು ಮಾಡಿದ ಬಂಗಾರವನ್ನು ಮಾರಾಟ/ಅಡಮಾನ ಮಾಡಿ ಹೊಸದಾಗಿ ಖರೀದಿ ಮಾಡಿದ ತಾಳಿ, 02 ಉಂಗುರ, 03 ತಾಳಿ ಗುಂಡುಗಳು, ಸುಮಾರು 24 ಗ್ರಾಂ ತೂಕದ ಒಂದು ಜೊತೆ ಬೆಳ್ಳಿ ಕಾಲು ಕಡಗ) ಬಂಗಾರದ ಹಾಗೂ ಬೆಳ್ಳಿಯ ಆಭರಣಗಳು ಹಾಗೂ 1.25.000/-ರೂ ನಗದು ಹಣ , ಕೃತ್ಯಕ್ಕೆ ಬಳಸಿದ ಸುಮಾರು 70.000/- ರೂ ಮೌಲ್ಯದ ಸ್ಕೂಟರ್ ಮತ್ತು ಸುಮಾರು 56.000/- ರೂ ಮೌಲ್ಯದ 07 ಮೊಬೈಲ್ ಪೋನ್‌ಗಳುಸೇರಿದಂತೆ ಒಟ್ಟು 7.83.000/- ರೂ ಮೌಲ್ಯದ ಬಂಗಾರ, ಬೆಳ್ಳಿ ಆಭರಣ, ನಗದು ಹಣ ವಶಪಡಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ. ಆರೋಪಿಗಳನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.

ಆರೋಪಿಗಳ ಹಿನ್ನೆಲೆ: ಆರೋಪಿತ ಕಿರಣ್ ನಾಯ್ಕ್ ದಾವಣಗೆರೆ ಜಿಲ್ಲೆಯ ವಿದ್ಯಾನಗರ ಠಾಣೆಯ 05 ಪ್ರಕರಣಗಳು, ಬಡಾವಣೆ ಠಾಣೆಯ 04, ಗಾಂಧಿನಗರ ಠಾಣೆಯ 01, ಬಸವನಗರ ಠಾಣೆಯ 01 ಪ್ರಕರಣ ಹಾಗೂ ಹಾಲಿ ಕೆಟಿಜೆ ನಗರ ಠಾಣೆಯ ಒಂದು ಪ್ರಕರಣ ಸೇರಿದಂತೆ ಒಟ್ಟು 12 ಕಳ್ಳತನ ಪ್ರಕರಣಗಳಲ್ಲಿ ಭಾಗಿಯಾಗಿರುವುದು ತಿಳಿದು ಬಂದಿರುತ್ತದೆ.ಈ ಪ್ರಕರಣದ ಕಾರ್ಯಚರಣೆಯಲ್ಲಿ ಭಾಗಿಯಾದ ತಂಡಕ್ಕೆ ಎಸ್ಪಿ ಉಮಾಪ್ರಶಾಂತ್ ಪ್ರಶಂಸನೆ ವ್ಯಕ್ತಪಡಿಸಿದ್ದಾರೆ.