ಡಿವಿಜಿ ಸುದ್ದಿ, ಬೆಂಗಳೂರು: ಸ್ಯಾಂಡಲ್ವುಡ್ನಲ್ಲಿ ಡ್ರಗ್ಸ್ ದಂಧೆ ಅವ್ಯಾಹತವಾಗಿ ನಡೆಯುತ್ತಿದೆ ಎನ್ನವ ಆಘಾತಕಾರಿ ಸುದ್ದಿ ಹೊರ ಬೀಳುತ್ತಲೇ , ಈ ದಂಧೆಯಲ್ಲಿ ಅಗೆದಷ್ಟು ಮಾಹಿತಿ ಹೊರಬೀಳುತ್ತಿದೆ. ನಟರಿಗಿಂತ ನಟಿಯರಿಗೇ ಹೆಚ್ಚು ಡ್ರಗ್ಸ್ ಪೂರೈಕೆ ಆಗುತ್ತಿದೆ ಎಂಬ ಮತ್ತೊಂದು ಆಘಾತಕಾರಿ ಮಾಹಿತಿ ತನಿಖೆಯಿಂದ ಬಯಲಾಗಿದೆ.
ರಾಷ್ಟ್ರೀಯ ಮಾದಕ ವಸ್ತು ನಿಗ್ರಹ ಘಟಕದ ಅಧಿಕಾರಿಗಳು ಬೆಂಗಳೂರಿನ ಕಲ್ಯಾಣನಗರದಲ್ಲಿರುವ ರಾಯಲ್ ಸೂಟ್ಸ್ ಹೋಟೆಲ್’ ಅಪಾರ್ಟ್ಮೆಂಟ್ ಮೇಲೆ ದಾಳಿ ಮಾಡಿ ಡ್ರಗ್ಸ್ ದಂಧೆ ಭೇದಿಸಿದ್ದಾರೆ. ದಂಧೆಯ ಕಿಂಗ್ಪಿನ್ ಡಿ. ಅನಿಕಾ, ಸ್ಯಾಂಡಲ್ ವುಡ್ ನ ನಟ–ನಟಿಯರು ಹಾಗೂ ಸಂಗೀತ ನಿರ್ದೇಶಕರ ಹೆಸರುಗಳನ್ನು ಬಾಯ್ಬಟ್ಟಿದ್ದಾಳೆ. ಆಕೆ ಸಹಚರರಾದ ಮೊಹಮ್ಮದ್ ಅನೂಪ್ ಹಾಗೂ ರಾಜೇಶ್ ರವೀಂದ್ರನ್ ಸಹ ಗ್ರಾಹಕರ ಪಟ್ಟಿಯನ್ನೇ ಎನ್ಸಿಬಿ ಅಧಿಕಾರಿಗಳಿಗೆ ನೀಡಿದ್ದಾರೆ ಎಂದು ಗೊತ್ತಾಗಿದೆ.
ಡ್ರಗ್ಸ್ ಮಾತ್ರೆಗಳಿಗೆ ನಟರಿಗಿಂತ ನಟಿಯರಿಂದಲೇ ಬೇಡಿಕೆ ಜಾಸ್ತಿ ಇದೆ. ಹೀಗಾಗಿ, ದಂಧೆಯನ್ನು ಮಹಿಳೆಯೇ ಆದ ಅನಿಕಾ ನಡೆಸುತ್ತಿದ್ದಳು. ಕನ್ನಡದ ಹೆಸರಾಂತ ನಟಿಯರು, ಧಾರಾವಾಹಿ ಕಲಾವಿದೆಯರು ಸಹ ಡ್ರಗ್ಸ್ಗೆ ಕಾಯಂ ಗ್ರಾಹಕರಾಗಿದ್ದಾರೆ ಎಂಬ ಸಂಗತಿ ತನಿಖೆಯಿಂದ ತಿಳಿದಿದೆ.
