ಪ್ರಮುಖ ಸುದ್ದಿ
ದಾವಣಗೆರೆ: ತರಳಬಾಳು ಬಡಾವಣೆ, ಬಸವಪಟ್ಟಣಕ್ಕೂ ವ್ಯಾಪಿಸಿದ ಕೊರೊನಾ ಸೋಂಕು
ಡಿವಿಜಿ ಸುದ್ದಿ, ದಾವಣಗೆರೆ: ದಾವಣಗೆರೆಯಲ್ಲಿ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿರುವ ಕೊರೊನಾ ಸೋಂಕು ನಿಯಂತ್ರಣಕ್ಕೆ ಸಿಗುವ ಲಕ್ಷಣ ಕಾಣುತ್ತಿಲ್ಲ. ಇಲ್ಲಿವರೆಗೆ ಹಳೇ ದಾವಣಗೆರೆ ಭಾಗದಲ್ಲಿ ಅತಿ ಹೆಚ್ಚಿನ ಪ್ರಮಾಣದಲ್ಲಿ ಕೊರೊನಾ ಸೋಂಕು ಕಾಣಿಸಿಕೊಳ್ಳುತ್ತಿತ್ತು. ಆದರೀಗ, ಹೊಸ ದಾವಣಗೆರೆಯ ಭಾಗಕ್ಕೆ ವಿಸ್ತರಿಸಿಕೊಂಡಿದೆ.
ಹೊಸ ದಾವಣಗೆರೆಯ ಶಿವಕುಮಾರಸ್ವಾಮಿ ಬಡಾವಣೆಯಲ್ಲಿ ಶುಕ್ರವಾರ ಒಬ್ಬರಲ್ಲಿ ಕಾಣಿಸಿಕೊಂಡಿದ್ದ ಕೊರೊನಾ ಸೋಂಕು, ಇಂದು ಪ್ರತಿಷ್ಠಿತ ಬಡಾವಣೆಗಳಲ್ಲೊಂದಾದ ತರಳಬಾಳು ಬಡಾವಣೆಯಲ್ಲಿ ತೀವ್ರ ಉಸಿರಾಟ ತೊಂದರೆಯಿಂದ ಬಳಲುತ್ತಿರುವ 47 ವರ್ಷದ ಮಹಿಳೆಯಲ್ಲಿ ಕೊರೊನಾ ಸೋಂಕು ಕಾಣಿಸಿಕೊಂಡಿದೆ. ಇದಲ್ಲದೆ ಚನ್ನಗಿರಿ ತಾಲ್ಲೂಕಿನ ಬಸವಪಟ್ಟಣಕ್ಕೂ ಕೊರೊನಾ ವ್ಯಾಪಿಸಿದ್ದು, ಗುಜರಾತಿನಿಂದ ಬಂದಿದ್ದ 39 ವರ್ಷದ ವ್ಯಕ್ತಿಯಲ್ಲಿ ಕೊರೊನಾ ಪಾಸಿಟಿವ್ ಪತ್ತೆಯಾಗಿದೆ.
ಜಿಲ್ಲೆಯಲ್ಲಿ ಇಂದು ಒಟ್ಟು 11 ಕೊರೊನಾ ಪಾಸಿಟಿವ್ ಪ್ರಕಣಗಳು ದಾಖಲಾಗಿದ್ದು, ವಿನಾಯಕ ನಗರದ ನಿವಾಸಿ 69 ವರ್ಷದ ಪಿ- 1378 ಕೇಸ್ ನಿಂದ 38 ವರ್ಷದ ಪುರುಷ, 9 ಮತ್ತು 14 ವರ್ಷದ ಬಾಲಕರು ಹಾಗೂ 36 ವರ್ಷದ ಮಹಿಳೆಯಲ್ಲಿ ಸೋಂಕು ತಗಲಿದೆ.
ಜಾಲಿನಗರದ ಮಹಿಳೆ ಕೇಸ್ ನಂಬರ್ 933 ರಿಂದ 9 ವರ್ಷದ ಬಾಲಕ , 26 ವರ್ಷದ ಮಹಿಳೆ, ಹಾಗೂ 22 ವರ್ಷದ ಯುವತಿಗೆ ವೈರಸ್ ಹರಡಿದೆ. ಇನ್ನು ಭಾಷಾನಗರದ 33 ವರ್ಷದ ಪುರುಷ ಹಾಗೂ ಜಾಲಿನಗರದ 63 ವರ್ಷದ ಮಹಿಳೆಯಲ್ಲಿ ತೀವ್ರ ಉಸಿರಾಟ ತೊಂದರೆಯಿಂದ ಸೋಂಕು ಬಂದಿದೆ.
