ನವದೆಹಲಿ: ವಾಣಿಜ್ಯ ಬಳಕೆಯ ಎಲ್ ಪಿಜಿ (LPG) ಸಿಲಿಂಡರ್ ಬೆಲೆಯನ್ನು 115 ರೂಪಾಯಿ ಇಳಿಕೆ ಮಾಡಲಾಗಿದೆ. ಇದರಿಂದ 19 ಕೆಜಿ ಗ್ಯಾಸ್ ಸಿಲಿಂಡರ್ ಇಂದಿನಿಂದ 115 ರೂ.ಗಳಷ್ಟು ಇಳಿಕೆಯಾಗಿದೆ. ಆದರೆ, ಗೃಹ ಬಳಕೆ ಗ್ಯಾಸ್ ಸಿಲಿಂಡರ್ ಬೆಲೆಯಲ್ಲಿ ಯಾವುದೇ ಇಳಿಕೆ ಮಾಡಿಲ್ಲ. ಕಳೆದ ತಿಂಗಳು 25 ರೂಪಾಯಿ ಕಡಿಮೆ ಆಗಿತ್ತು.
ದರ ಇಳಿಕೆಯಿಂದ ವಾಣಿಜ್ಯ ಗ್ಯಾಸ್ ಸಿಲಿಂಡರ್ ಬೆಲೆ 1744.50 ರೂ.ಗೆ ಇಳಿದಿದೆ. ಈ ಮೊದಲು ಇದು 1859.50 ರೂ.ಗೆ ಲಭ್ಯವಿತ್ತು. ವಾಣಿಜ್ಯ ಸಿಲಿಂಡರ್ ಗಳ ಬೆಲೆಯನ್ನು ಸತತ 7ನೇ ತಿಂಗಳು ಕಡಿಮೆ ಮಾಡಲಾಗಿದೆ. ಈ ಹಿಂದೆ ಮೇ ತಿಂಗಳಲ್ಲಿ 2,354ರೂ.ಗೆ ತಲುಪಿತು. ನಂತರ ಸತತ ಇಳಿಕೆ ಕಂಡಿದೆ. 14 ಕೆಜಿ ಗೃಹಬಳಕೆಯ ಎಲ್ ಪಿ ಜಿ ಸಿಲಿಂಡರ್ ಇಳಿಕೆ ಮಾಡಿಲ್ಲ. ಈ ಸಿಲಿಂಡರ್ ದೆಹಲಿಯಲ್ಲಿ 1053 ರೂ., ಮುಂಬೈನಲ್ಲಿ 1052.50 ರೂ., ಕೋಲ್ಕತಾದಲ್ಲಿ 1079 ರೂ., ಚೆನ್ನೈನಲ್ಲಿ 1068.50 ರೂ.ಗೆ ಸಿಗಲಿದೆ.
