ನವದೆಹಲಿ: ದಾವಣಗೆರೆ ಸಹಿತ ರಾಜ್ಯದ 16 ನಗರದಲ್ಲಿ ಖಾಸಗಿ ಎಫ್ ಎಂ ಕೇಂದ್ರ ತೆರೆಯಲು ಕೇಂದ್ರ ಸಂಪುಟ ಒಪ್ಪಿಗೆ ನೀಡಿದೆ. ಖಾಸಗಿ ಎಫ್‌ಎಂ ರೇಡಿಯೋ 3ನೇ ಹಂತ ನೀತಿಯಡಿ 784 ಕೋಟಿ ರೂ. ಮೀಸಲು ಬೆಲೆಯೊಂದಿಗೆ, ಕರ್ನಾಟಕದ 16 ನಗರ ಮತ್ತು ದೇಶದ ಒಟ್ಟು 234 ನಗರಗಳಲ್ಲಿ 730 ಎಫ್ ಎಂ ಚಾನೆಲ್‌ಗ‌ಳನ್ನು ಆರಂಭಿಸಲು ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಕೇಂದ್ರ ಸಚಿವ ಸಂಪುಟ ಒಪ್ಪಿಗೆ ನೀಡಿದೆ.
ರಾಜ್ಯದ ಬೆಳಗಾವಿ, ಬಳ್ಳಾರಿ, ವಿಜಯಪುರ, ದಾವಣಗೆರೆ, ಶಿವಮೊಗ್ಗ ತಲಾ 4, ಬಾಗಲಕೋಟೆ, ಬೀದರ್‌, ಚಿಕ್ಕ ಮಗಳೂರು, ಚಿತ್ರದುರ್ಗ, ಗದಗ -ಬೆಟಗೇರಿ, ಹೊಸ ಪೇಟೆ, ಹಾಸನ, ಕೋಲಾರ, ರಾಯ ಚೂರು, ತುಮಕೂರು ಮತ್ತು ಉಡುಪಿ ತಲಾ 3 ಕೇಂದ್ರ ತೆರೆಯಲಿದೆ.ಇದಕ್ಕೆ ಸಂಬಂಧಿಸಿದಂತೆ ಇ-ಹರಾಜು ನಡೆಸಲಾಗುತ್ತದೆ ಎಂದು ಕೇಂದ್ರ ಸಚಿವ ಅಶ್ವಿ‌ನಿ ವೈಷ್ಣವ್‌ ಮಾಹಿತಿ ನೀಡಿದ್ದಾರೆ.
ಎಫ್‌ಎಂ ಚಾನೆಲ್‌ಗ‌ಳಿಂದ ವಾರ್ಷಿಕ ಪರವಾನಿಗೆ ಶುಲ್ಕ ಸಂಗ್ರಹಿಸುವ ಪ್ರಸ್ತಾವಕ್ಕೂ ಒಪ್ಪಿಗೆ ದೊರೆತಿದೆ. ಜಿಎಸ್‌ಟಿ ಹೊರತುಪಡಿಸಿ ಆದಾಯದ ಶೇ. 4ರಷ್ಟು ಶುಲ್ಕತೆರಬೇಕಾಗುತ್ತದೆ. ಖಾಸಗಿ ಎಫ್‌ಎಂಗಳಿಂದ ದೂರವಿದ್ದ ಈ ನಗರಗಳಲ್ಲಿ, ಇನ್ನು ಸ್ಥಳೀಯ ವಿಷಯವಸ್ತುಗಳನ್ನು ಸ್ಥಳೀಯ ಭಾಷೆಯಲ್ಲಿ ನೀಡಲು ಸಾಧ್ಯವಾಗಲಿದೆ. ಇವುಗಳಿಂದ ಹೊಸ ಉದ್ಯೋಗಾವಕಾಶ ಸೃಷ್ಟಿಯಾಗಲಿವೆ. ಸ್ಥಳೀಯ ಭಾಷೆ, ಸಂಸ್ಕೃತಿ ಉತ್ತೇಜನಕ್ಕೂ ಸಹಕಾರಿಯಾಗಲಿದೆ. ಸರಕಾರ ಜನರನ್ನು ತಲುಪಲು ಸುಲಭವಾಗಲಿದೆ ಎಂದು ತಿಳಿಸಿದ್ದಾರೆ.
