ಬೆಂಗಳೂರು: ಆಸ್ತಿ ಖರೀದಿ ಮಾಡಿದ ನಂತರ ಖಾತೆ ಮಾಡಿಸಿಕೊಳ್ಳಲು ಕಚೇರಿಗಳಿಗೆ ಅಲೆಯುವ ಕಾಲ ಇತ್ತು. ಈಗ ಕಾಲ ಬದಕಾಗಿದೆ. ಆಸ್ತಿ ನೋಂದಣಿಯಾದ ತಕ್ಷಣ ಸ್ವಯಂ ಚಾಲಿತವಾಗಿ ಖಾತೆ ಬದಲಾವಣೆಯಾಗುವ ‘ಆಟೋ ಮ್ಯುಟೇಶನ್’ ವ್ಯವಸ್ಥೆ ರಾಜ್ಯದಲ್ಲಿ ಯಾಸ್ವಿಯಾಗಿ ಜಾರಿಯಾಗಿದ್ದು, ಪ್ರಸ್ತುತ ಶೇ.98ರಷ್ಟು ಪ್ರಗತಿ ಕಂಡಿದೆ ಎಂದು ಕಂದಾಯ (revenue) ಸಚಿವ ಕೃಷ್ಣಬೈರೇಗೌಡ ತಿಳಿಸಿದ್ದಾರೆ.
ವಿಧಾನ ಪರಿಷತ್ತಿನಲ್ಲಿ ರಾಮೋಜಿಗೌಡ ಅವರ ಪ್ರಶ್ನೆಗೆ ಉತ್ತರಿಸಿದ ಸಚಿವರು, ಈ ಸುಧಾರಣೆಯ ಕುರಿತು ಮಹತ್ವದ ಅಂಶಗಳನ್ನು ಹಂಚಿಕೊಂಡರು.
ನೇರವಾಗಿ ಖಾತೆ ಬದಲಾವಣೆ
ಯಾರನ್ನೂ ಭೇಟಿ ಮಾಡುವ ಅಗತ್ಯವಿಲ್ಲದೆ, ಮಧ್ಯವರ್ತಿಗಳ ಕಾಟವಿಲ್ಲದೆ ನೋಂದಣಿ ನಂತರ ನೇರವಾಗಿ ಖಾತೆ ಬದಲಾವಣೆಯಾಗುತ್ತಿದೆ. ಇದು ದೇಶದಲ್ಲೇ ಒಂದು ಪ್ರಗತಿಪರ ಹೆಜ್ಜೆ. ಕಳೆದ ವರ್ಷ ಶೇ. 66ರಷ್ಟಿದ್ದ ಆಟೋ ಮ್ಯುಟೇಶನ್ ಪ್ರಮಾಣವನ್ನು ಕಳೆದ ತಿಂಗಳಿನಿಂದ ಶೇ. 98ಕ್ಕೆ ಹೆಚ್ಚಿಸಲಾಗಿದೆ.
16ನೇ ದಿನಕ್ಕೆ ಖಾತೆ ಬದಲಾವಣೆ
ಕೆಲವು ಅರ್ಜಿಗಳು ಸಲ್ಲಿಕೆಯಾದ 3 ಗಂಟೆಯಲ್ಲೇ ವಿಲೇವಾರಿಯಾದರೆ, ಇನ್ನು ಕೆಲವು ನಿಯಮಾನುಸಾರ 8 ಅಥವಾ 16ನೇ ದಿನಕ್ಕೆ ಖಾತೆ ಬದಲಾವಣೆಯಾಗುತ್ತವೆ. ಒಂದು ವೇಳೆ ಆಸ್ತಿ ಸಂಬಂಧ ಕಾನೂನು ತಕರಾರುಗಳು ದಾಖಲಾದರೆ ಮಾತ್ರ ಪ್ರಕ್ರಿಯೆ ವಿಳಂಬವಾಗುತ್ತದೆ, ಉಳಿದಂತೆ ಎಲ್ಲವೂ ಡಿಜಿಟಲ್ ವೇಗದಲ್ಲಿ ನಡೆಯಲಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.
