ಬೆಂಗಳೂರು : ತಾನು ಆರ್ ಎಸ್ ಎಸ್ ಮುಖಂಡ ಹೇಳಿಕೊಂಡು, ತನಗೆ ಬಿಜೆಪಿಯ ರಾಷ್ಟ್ರೀಯ ಅಧ್ಯಕ್ಷ ಜೆಪಿ ನಡ್ಡಾ ಸೇರಿದಂತೆ ಅನೇಕರ ಗಣ್ಯರು ಪರಿಚಯವಿರುವುದಾಗಿ ನಂಬಿಸಿ ಕೋಟಿ, ಕೋಟಿ ವಂಚನೆ ಮಾಡುತ್ತಿದ್ದ ಯುವರಾಜ್ ಎಂಬ ಆರೋಪಿಯನ್ನು ಸಿಸಿಬಿ ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಈ ಬಗ್ಗೆ ಮಾಹಿತಿ ಕಲೆ ಹಾಕಿದ ಸಿಸಿಬಿ ಇಂದು ಬೆಳಗ್ಗೆ ಯುವರಾಜ್ ಮನೆಯ ಮೇಲೆ ರೈಡ್ ಮಾಡಿ, ಬಂಧಿಸಿದೆ. ಈ ಕುರಿತಂತೆ ಮಾಹಿತಿ ನೀಡಿದ ಸಿಸಿಬಿ ಮುಖ್ಯಸ್ಥ ಸಂದೀಪ್ ಪಾಟೀಲ್, ಯುವರಾಜ್ ಆಲಿಯಾಸ್ ಸ್ವಾಮಿ ಅನೇಕರಿಗೆ ವಂಚಿಸಿದ್ದ ಬಗ್ಗೆ ದೂರುಗಳು ಬಂದಿತ್ತು. ಈ ದೂರಿನ ಆಧಾರದ ಮೇಲೆ ಇಂದು ವಾರಂಟ್ ಪಡೆದು ಆತನ ಮನೆಯ ಮೇಲೆ ದಾಳಿ ನಡೆಸಲಾಗಿತ್ತು.
ತಾನು RSS ಮುಖಂಡ ಎಂದು ಜನರನ್ನು ನಂಬಿಸಿದ್ದಲ್ಲದೇ, ಅನೇಕರಿಂದ ಆ ಕೆಲಸ, ಈ ಕೆಲಸ ಮಾಡಿಸಿಕೊಡುವುದಾಗಿ ನಂಬಿಸಿ, ಕೋಟ್ಯಾಂತರ ರೂ ಪಂಗನಾಮ ಹಾಕಿದ್ದನು. ಇಂದು ಸಿಸಿಬಿ ಪೊಲೀಸರಿಗೆ ಉದ್ಯಮಿಯೊಬ್ಬರು ನಂಬಿಸಿ, ಮೋಸ ಮಾಡಿದ್ದಾರೆ ಎಂಬ ದೂರಿನ ಹಿನ್ನಲೆಯಲ್ಲಿ, ವಾರೆಂಟ್ ಪಡೆದು, ಪುಂಗಿದಾಸ ಯುವರಾಜ್ ಮನೆ ಮೇಲೆ ರೈಡ್ ಮಾಡಿದ್ದಾರೆ. ಕೋಟ್ಯಾಂತರ ರೂಪಾಯಿ ವಂಚನೆ ಬಗ್ಗೆ ಪತ್ತೆ ಹಚ್ಚುಲಾಗುತ್ತಿದೆ. ಈ ದಾಳಿ ವೇಳೆ 90 ಕೋಟಿ ಮೌಲ್ಯದ ಚಕ್ ಗಳು ಪತ್ತೆಯಾಗಿವೆ.
ಕೆಎಸ್ ಆರ್ ಟಿ ಸಿ ಚೇರ್ಮನ್ ಮಾಡುವುದಾಗಿ1 ಕೋಟಿ ಪಡೆದು ವಂಚನೆ ಮಾಡಿರುವುದಾಗಿ ಆರೋಪ ಕೇಳಿ ಬಂದಿದೆ. ಉದ್ಯಮಿಯಿಂದ ಹಣ ಪಡೆದು ಕೋಟಿ ಕೋಟಿ ವಂಚನೆ ಮಾಡಿದ್ದಾನೆ ಎನ್ನಲಾಗಿದೆ. ಈತ ಜೆಪಿ ನಡ್ಡಾ, ಅಮಿತ್ ಶಾ ಪರಿಚಯವಿರುವುದಾಗಿ ನಂಬಿಸುತ್ತಿದ್ದನು. ಇದರಿಂದಲೇ ವಂಚನೆ ಮಾಡಿದ್ದಾನೆ. ನಡ್ಡಾ ಸೇರಿದಂತೆ ರಾಜಕೀಯ ಪ್ರಮುಖರ ಜೊತೆಗಿರುವ ಪೋಟೋ ತೋರಿಸಿ ವಂಚನೆ ಮಾಡುತ್ತಿದ್ದ ಎಂದು ಮಾಹಿತಿ ನೀಡಿದ್ದಾರೆ.
