ರಾಜ್ಯ ಮಹಿಳಾ ನಿಲಯಕ್ಕೆ ಉಪ ಲೋಕಾಯುಕ್ತ ಭೇಟಿ; ಅವ್ಯವಸ್ಥೆ ಕಂಡು ಗರಂ

ದಾವಣಗೆರೆ: ಉಪ ಲೋಕಾಯುಕ್ತ ಬಿ.ವೀರಪ್ಪ ರಾಜ್ಯ ಮಹಿಳಾ ನಿಲಯಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಈ ವೇಳೆ ಅವ್ಯವಸ್ಥೆ‌ ಕಂಡ ಅಧಿಕಾರಿ ಮತ್ತು ಸಿಬ್ಬಂದಿಗಳನ್ನು ತರಾಟೆ ತೆಗೆದುಕೊಂಡರು.

ನಗರದ ಶ್ರೀರಾಮ ನಗರದಲ್ಲಿರುವ ಮಹಿಳಾ ನಿಲಯಕ್ಕೆ ಸಿಇಓ ಸುರೇಶ ಬಿ. ಇಟ್ನಾಳ್‌, ಎಸ್ಪಿ ಉಮಾ ಪ್ರಶಾಂತ್ ಜೊತೆ ಭೇಟಿ‌‌ ನೀಡಿದ್ದರು. ಈ ವೇಳೆ ನಿವಾಸಿ ಮಕ್ಕಳು, ಮಹಿಳೆಯರಿಂದ ವ್ಯವಸ್ಥೆ, ಸೌಲಭ್ಯಗಳ ಬಗ್ಗೆ ಮಾಹಿತಿ ಪಡೆದು ಪರಿಶೀಲಿಸಿದರು.

ಮಹಿಳಾ ನಿಲಯದ ನಿವಾಸಿಗಳಿಗೆ ಸೌಲಭ್ಯಗಳ ಜೊತೆ‌ ಪ್ರೀತಿಯನ್ನು ತೋರಿಸುವುದು ಮುಖ್ಯ. ಈ ವೇಳೆ‌ ವೈದ್ಯರು ಹಾಜರು ಇಲ್ಕದ ಹಿನ್ನೆಲೆ ತಕ್ಷಣ ಆ ವೈದ್ಯರಿಗೆ ನೋಟಿಸ್ ಜಾರಿ ಮಾಡುವಂತೆ ಸೂಚಿಸಿದರು. ಗುಣಮಟ್ಟದ ಆಹಾರ ನೀಡುಬೇಕು. ಇಲ್ಲಿ ಮೂಲ ಸೌಕರ್ಯ ಕೊರತೆ ಇದೆ. ಇದೇ ರೀತಿ ನಿರ್ಲಕ್ಷ್ಯ ಮುಂದುವರಿದರೆ ಲೋಕಾಯುಕ್ತದಲ್ಲಿ ಪ್ರಕರಣ ದಾಖಲಿಸಲಾಗುವುದು ಎಂದು ಎಚ್ಚರಿಕೆ ನೀಡಿದರು.

ಕೆಲ ಮಹಿಳೆಯರು ತಾವು ವಾಪಸ್‌ ತಮ್ಮ ಮನೆಗಳಿಗೆ ಹೋಗಲು ಅವಕಾಶಕ್ಕೆ ಮನವಿ ಮಾಡಿದರು. ಆಗ ಇಂತಹವರ ಸಂಬಂಧಿಗಳೊಂದಿಗೆ ಸಮಾಲೋಚನೆ ನಡೆಸಿ, ಸಂಬಂಧಿಸಿದ ಅಧಿಕಾರಿಗಳು ಸೂಕ್ತ ಕ್ರಮ ಕೈಗೊಳ್ಳಿ. ಅಲ್ಲದೇ, ಇಲ್ಲಿನ ನಿವಾಸಿ ಮಹಿಳೆಯರಿಗೆ ವರರನ್ನು ನೋಡಿದ ವಿಚಾರ ಒಳ್ಳೆಯದು. ಆದಷ್ಟು ಬೇಗನೆ ನಿಯಮಾನುಸಾರ ನೀವೆಲ್ಲರೂ ನಿಂತು, ಮದುವೆ ಮಾಡಿಸುವಂತೆ ಉಪ ಲೋಕಾಯುಕ್ತರು ತಿಳಿಸಿದರು.

ಸರ್ಕಾರಿ ಬಾಲಕಿಯರ ಬಾಲ ಮಂದಿರಕ್ಕೆ ಭೇಟಿ ನೀಡಿದ್ದ ಉಪ ಲೋಕಾಯುಕ್ತರು ಶಾಲೆಗೆ ಹೋಗಲು ವಾಹನ ವ್ಯವಸ್ಥೆ ಮಾಡುವಂತೆ ಸಂಬಂಧಿಸಿದ ಅಧಿಕಾರಿಗಳಿಗೆ ಸೂಚನೆ ನೀಡಿದರು.

ನಂತರ ಆಹಾರ ದಾಸ್ತಾನು ಕೊಠಡಿ ವೀಕ್ಷಿಸಿದರು. ಗೋಧಿಯಲ್ಲಿ ಹುಳು ಇದ್ದುದು ಕಂಡುಬಂದಿದ್ದರಿಂದ, ನಿಲಯ ಪಾಲಕರು ಇದನ್ನೆಲ್ಲಾ ಗಮನಿಸಬೇಕು. ಇಂತಹ ಧಾನ್ಯ ಸರಬರಾಜು ಮಾಡಿದಾಗ ಕೂಡಲೇ ತಿರಸ್ಕರಿಸಬೇಕು ಎಂದರು.