ದಾವಣಗೆರೆ: ಮಾಜಿ ಸಿಎಂ ಸಿದ್ದರಾಮಯ್ಯ ಅವರ ಒಪ್ಪಿಗೆ ಪಡೆದೇ ನಾವು ಕುರುಬ ಸಮುದಾಯದ ಎಸ್ ಟಿ ಮೀಸಲಾತಿ ಹೋರಾಟ ಶುರು ಮಾಡಿದ್ದೇವೆ. ಈ ಹೋರಾಟದ ಹಿಂದೆ ಆರ್ ಎಸ್ ಎಸ್ ಕೈವಾಡವಿಲ್ಲ ಎಂದು ಕನಕ ಗುರುಪೀಠದ ನಿರಂಜನಾನಂದ ಪುರಿ ಸ್ವಾಮೀಜಿ ಸ್ಪಷ್ಟನೆ ನೀಡಿದರು.
ಕರುಬ ಸಮುದಾಯದ ರಾಜ್ಯ ಮಟ್ಟದ ಬೃಹತ್ ಸಮಾವೇಶದ ಪೂರ್ವಭಾವಿ ಸಭೆ ನಂತರ ಮಾತನಾಡಿದ ಶ್ರೀಗಳು, ನಾವು ದೆಹಲಿಗೆ ಹೋದಾಗ ಬಿ.ಎಲ್ ಸಂತೋಷ ಅವರನ್ನ ಭೇಟಿ ಮಾಡಿದ್ದು ನಿಜ. ಆದ್ರೆ ಆರ್ ಎಸ್ ಎಸ್ ಸಂತೋಷ ಅವನ್ನ ಭೇಟಿ ಮಾಡಿಲ್ಲ. ಬಿಜೆಪಿ ರಾಷ್ಟ್ರೀಯ ಸಂಘಟನಾ ಕಾರ್ಯದರ್ಶಿ ಸಂತೋಷ ಅವರನ್ನು ಭೇಟಿ ಮಾಡಿದ್ದೇವೆ. ಹಾಗಂತಾ ಆರ್ ಎಸ್ ಎಸ್ ಈ ಹೋರಾಟದಲ್ಲಿ ಕೈವಾಡ ಎನ್ನಲು ಬರುವುದಿಲ್ಲ. ನಮಗೆ ಬೇಕಿರುವುದು ಎಸ್ ಟಿ ಮೀಸಲಾತಿ. ಇದನ್ನ ಯಾರು ಕೊಟ್ಟು ಅವರನ್ನ ಸಮಾಜ ಸ್ವಾಗತಿಸುತ್ತದೆ ಎಂದರು.
ಸಿದ್ದರಾಮಯ್ಯ ಅವರ ಒಪ್ಪಿಗೆ ಪಡೆದೇ ಹೋರಾಟ ಮಾಡಲಾಗುತ್ತಿದೆ. ಸಿದ್ದರಾಮಯ್ಯ ಅವರು ಯಾವಾಗ ಬೇಕಾದರೂ ಹೋರಾಟಕ್ಕೆ ಬರಬಹುದು. ಈ ಹೋರಾಟದಿಂದ ಸಿದ್ದರಾಮಯ್ಯ ವರ್ಚಸ್ಸು ಕುಗ್ಗಲ್ಲ. ಸಿದ್ದರಾಮಯ್ಯ ಅಹಿಂದಾ ನಾಯಕ. ಮೇಲಾಗಿ ಕುರುಬ ಸಮಾಜದ ನಾಯಕ. ಇಂತಹ ಹತ್ತು ಹೋರಾಟ ನಡೆದರೂ ಅವರ ವರ್ಚಸ್ಸು ಕುಗ್ಗಲ್ಲ ಎಂದರು.
