ದಾವಣಗೆರೆ: ಆನ್ ಲೈನ್ ನಲ್ಲಿ ಹಣ ಹೂಡಿಕೆ ಮಾಡಿದ್ದರೆ, ಮನೆಯಿಂದಲೇ ಲಕ್ಷ ಲಕ್ಷ ಕಮಿಷನ್ ಪಡೆಯಬಹುದು ಎಂಬ ಆನ್ ಲೈನ್ ವಂಚನೆ ಬಲೆಗೆ ಬಿದ್ದ ಮಹಿಳೆಯೊಬ್ಬರು ಬರೋಬ್ಬರಿ 17.58 ಲಕ್ಷ ಕಳೆದುಕೊಂಡಿದ್ದಾರೆ.
ಸರಸ್ವತಿ ಬಡಾವಣೆ ನಿವಾಸಿ ಎಂ. ದಾಸಪ್ಪರ ಸೊಸೆ ನಿಸರ್ಗ ಮೋಸ ಹೋದವರು. ಮನೆಯಲ್ಲಿದ್ದುಕೊಂಡೇ ಹಣ ಹೂಡಿಕೆ ಮಾಡಿ ಕಮೀಷನ್ ಲೆಕ್ಕದಲ್ಲಿ ಲಾಭ ಪಡೆಯಬಹುದು ಎಂದು ಆನ್ ಲೈನ್ ವಂಚಕರು ಆಮೀಷವೊಡ್ಡಿದ್ದರು ಹಣ ಸಂಪಾದನೆ ಮಾಡುವ ಆಸೆಯಿಂದ ಮಹಿಳೆ ಹೂಡಿಕೆ ಮಾಡಿದ್ದರು. ಪತಿಯೊಂದಿಗೆ ಇಂಗ್ಲೆಂಡ್ ನಲ್ಲಿ ನೆಲೆಸಿರುವ
ನಿಸರ್ಗ, ಖಾಸಗಿ ಕಂಪೆನಿಯಲ್ಲಿ ಉದ್ಯೋಗಿಯಾಗಿದ್ದಾರೆ.
ಟ್ರೇಡ್ ಎಕ್ಸ್ ಸಂಸ್ಥೆಯ ಹೆಸರಿನಲ್ಲಿ ಅಪರಿಚಿತ ವ್ಯಕ್ತಿಯೊಬ್ಬ ವಾಟ್ಸಪ್ ಸಂದೇಶ ಕಳುಹಿಸಿದ್ದಾನೆ. ಕಂಪೆನಿಯಲ್ಲಿ ಹಣ ಹೂಡಿಕೆ ಮಾಡಿದರೆ ತಿಂಗಳಿಗೆ 1 ಲಕ್ಷ ರೂಪಾಯಿ ಸಂಪಾದನೆ
ಮಾಡಬಹುದು ಎಂದು ನಂಬಿಸಿದ್ದಾನೆ. ವಂಚಕರ ಮಾತು ನಂಬಿ ವಿವಿಧ ಹಂತ ಹಂತದಲ್ಲಿ 17.58 ಲಕ್ಷ ರೂಪಾಯಿಯನ್ನು ಅಪರಿಚಿತ ವ್ಯಕ್ತಿಯ ಬ್ಯಾಂಕ್ ಖಾತೆಗೆ ವರ್ಗಾಯಿಸಿದ್ದಾರೆ. ಹಣ ವರ್ಗಾವಣೆ ಬಳಿಕ ಅಪರಿಚಿತ ವ್ಯಕ್ತಿಗೆ ಕರೆ ಮಾಡಿದರೆ ಸ್ವೀಕರಿಸುತ್ತಿಲ್ಲ. ಆಗ ವಂಚನೆ ನಡೆದಿರುವುದು ಗೊತ್ತಾಗಿದೆ.
ನಿಸರ್ಗ ಅವರ ಮಾವ ಎಂ. ದಾಸಪ್ಪ ಅವರು ನೀಡಿದ ದೂರಿನ ಅನ್ವಯ ದಾವಣಗೆರೆ ಸೈಬರ್ ಕ್ರೈಂ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಹಣ ವಾಪಸ್ ಕೊಡಿಸಲು ಮನವಿ ಮಾಡಿದ್ದಾರೆ.
