ಅಡಿಕೆ‌ನಾಡು ಚನ್ನಗಿರಿಯಲ್ಲಿ ದಾಖಲೆ ಬೆಲೆಯತ್ತ ಅಡಿಕೆ; ಕಳೆದ ವರ್ಷದ 60 ಸಾವಿರ ಗಡಿ ದಾಟುತ್ತಾ..?

ದಾವಣಗೆರೆ: ಜಿಲ್ಲೆಯ ಪ್ರಮುಖ ವಾಣಿಜ್ಯ ಬೆಳೆಯಾದ ಅಡಿಕೆ ಧಾರಣೆಯಲ್ಲಿ ಇಂದು (ಜೂ.07) ಮತ್ತಷ್ಟು ಏರಿಕೆಯಾಗಿದೆ. ಕಳೆದ ಒಂದು ತಿಂಗಳಿಂದ ಅಡಿಕೆ ಬೆಲೆ ಏರಿಕೆಯತ್ತ‌ ಮುಖ ಮಾಡಿದ್ದು, ರೈತರ ಮುಖದಲ್ಲಿ ಸಂತಸ ಮೂಡಿದೆ. ಏಪ್ರಿಲ್ ನಲ್ಲಿ 48 ಸಾವಿರವಿದ್ದ ಬೆಲೆ, ಮೇ ನಲ್ಲಿ 49 ಸಾವಿರ ಗಡಿ ದಾಟಿತ್ತು. ಇದೀಗ 50 ಸಾವಿರ ಗಡಿ ದಾಟಿ 51 ಸಾವಿರ ಗಡಿಯತ್ತ ಹೆಜ್ಜೆ ಹಾಕುತ್ತಿದೆ.ಇಂದು (ಜೂ.07) ಉತ್ತಮ ರಾಶಿ ಅಡಿಕೆ ಗರಿಷ್ಠ ಬೆಲೆ 50,599 ರೂ.ಗೆ ಮಾರಾಟವಾಗಿದೆ. ಹಿಂದಿನ ದಿನದ ಮಾರುಕಟ್ಟೆಗೆ ಹೋಲಿಸಿದರೆ 100 ರೂಪಾಯಿಯಷ್ಟು ಚೇತರಿಕೆ ಕಂಡಿದೆ.

ಜಿಲ್ಲೆಯ ಪ್ರಮುಖ ಮಾರುಕಟ್ಟೆಯಾದ ಅಡಿಕೆನಾಡು ಚನ್ನಗಿರಿ ವಹಿವಾಟಿನಲ್ಲಿ ಜೂನ್ 07ರಂದು ಪ್ರತಿ ಕ್ವಿಂಟಾಲ್ ಉತ್ತಮ ರಾಶಿ ಅಡಿಕೆ ಕನಿಷ್ಠ ಬೆಲೆ 49,099, ಗರಿಷ್ಠ ಬೆಲೆ 50,599 ಹಾಗೂ ಸರಾಸರಿ ಬೆಲೆ 49,957ರೂ. ಆಗಿದೆ. ಈ ಬೆಲೆ ಈ ವರ್ಷದಲ್ಲಿಯೇಗರಿಷ್ಠ ಬೆಲೆಯಾಗಿದೆ. ಕಳೆದ ವರ್ಷ ಗರಿಷ್ಠ 60 ಸಾವಿರ ತಲುಪಿತ್ತು. ಇದೀಗ ಈ ವರ್ಷದ ಬೆಲೆ, ಕಳೆದ ವರ್ಷದ ಬೆಲೆ ಮೀರಿ ಮುಂದೆ ಸಾಗುತ್ತಾ ಎಂಬುದನ್ನು ಕಾದು ನೋಡಬೇಕಿದೆ.