ದಾವಣಗೆರೆ: ಸೈಟ್ ಕೊಡುವುದಾಗಿ ನಂಬಿಸಿ ಮಹಿಳೆಯಿಂದ 33 ಲಕ್ಷ ರೂ. ಪಡೆದು ವಂಚಿಸಿದ ಘಟನೆ ನಡೆದಿದೆ. ಹಣ ವಾಪಸ್ ಕೇಳಿದ್ದಕ್ಕೆ ಮಹಿಳೆಗೆ ಅಶ್ಲೀಲ ವಿಡಿಯೋ ಕಳುಹಿಸಿ ಕೊಲೆ ಬೆದರಿಕೆ ಹಾಕಿದ ವ್ಯಕ್ತಿ ವಿರುದ್ಧ ದಾವಣಗೆರೆಯ ಸೈಬರ್ ಕ್ರೈಂ (ಸಿಇಎನ್) ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ನಗರದ ಎಂ.ಸಿ.ಸಿ ‘ಬಿ’ ಬ್ಲಾಕ್ ನಿವಾಸಿ ವಂಚನೆಗೊಳಗಾದ ಗೃಹಿಣಿಯಾಗಿದ್ದು, ಹಾವೇರಿ ಜಿಲ್ಲೆಯ ಹಾವನೂರಿನ ಸುನಿಲ್ ಎಂಬಾತ ಆರೋಪಿ. ಗೃಹಿಣಿಯ ಪತಿ ಹಾಗೂ ಸುನಿಲ್ ನಡುವೆ ವ್ಯವಹಾರಿಕ ಪರಿಚಯವಿತ್ತು. ಕೊಡಗನೂರು ಗ್ರಾಮದ 4 ಸೈಟ್ಗಳನ್ನು ಪರಿಚಯಸ್ಥರಿಗೆ ಮಾರಾಟ ಮಾಡಿಸಿಕೊಡುವುದಾಗಿ ಸುನಿಲ್ ನಂಬಿಸಿದ್ದ. ಈ ಸಂಬಂಧ ಒಟ್ಟು 39 ಲಕ್ಷ ರೂ.ಗೆ ಒಪ್ಪಂದ ಮಾಡಿಸಿ, ಮುಂಗಡವಾಗಿ 33 ಲಕ್ಷ ರೂ.ಗಳನ್ನು ಕೊಡಿಸಿದ್ದನು. ಬಾಕಿ ಹಣವನ್ನು ರಿಜಿಸ್ಟ್ರೇಷನ್ ಸಮಯದಲ್ಲಿ ಕೊಡುವುದಾಗಿ ತಿಳಿಸಲಾಗಿತ್ತು.
ಬಳಿಕ ತನಗೆ ತುರ್ತು ಹಣದ ಅವಶ್ಯಕತೆಯಿದೆ ಎಂದು ಹೇಳಿ, ಸೈಟ್ ಅಡ್ವಾನ್ಸ್ ಹಣವಾಗಿದ್ದ 33 ಲಕ್ಷ ರೂ.ಗಳನ್ನು ಸುನಿಲ್ ತಾನೇ ಪಡೆದುಕೊಂಡಿದ್ದ. ಸೈಟ್ ರಿಜಿಸ್ಟರ್ ಆಗುವಾಗ ಬಡ್ಡಿ ಸಮೇತ ಹಣ ಮರಳಿಸುವುದಾಗಿ ನಂಬಿಸಿ ಭದ್ರತೆಗಾಗಿ ಚೆಕ್ ಹಾಗೂ ಖಾಲಿ ಹಾಳೆಯಲ್ಲಿ ಬರೆದುಕೊಟ್ಟಿದ್ದನು.
ಇತ್ತೀಚೆಗೆ ಹಣ ವಾಪಸ್ ಕೇಳಿದಾಗ ಇದರಿಂದ ಆಕ್ರೋಶಗೊಂಡ ಸುನಿಲ್ ತನ್ನ ಮೊಬೈಲ್ನಿಂದ ಗೃಹಿಣಿಯ ಮೊಬೈಲ್ಗೆ ಅಶ್ಲೀಲ ವಿಡಿಯೋ ಒಂದನ್ನು ಕಳುಹಿಸಿದ್ದಾನೆ. ಅಷ್ಟೇ ಅಲ್ಲದೆ, `ಹಣ ಕೊಡಲು ಆಗಲ್ಲ, ಏನು ಮಾಡಿಕೊಳ್ಳುತ್ತೀರೋ ಮಾಡಿಕೊಳ್ಳಿ. ಮತ್ತೊಮ್ಮೆ ಹಣ ಕೇಳಲು ಬಂದರೆ ಕೊಲೆಯಾಗುತ್ತೀರಿ ಎಂದು ಮೊಬೈಲ್ ಸಂದೇಶದ ಮೂಲಕ ಜೀವ ಬೆದರಿಕೆ ಹಾಕಿದ್ದಾನೆ ಎಂದು ಮಹಿಳೆ ದೂರನಲ್ಲಿ ತಿಳಿಸಿದ್ದಾರೆ.
