ಡಿವಿಜಿ ಸುದ್ದಿ, ಯಾದಗಿರಿ: ಒಂದು ಮಗುವಿಗೆ ಜನ್ಮ ನೀಡುವುದೇ ಕಷ್ಟವಾಗಿರುವ ಈ ದಿನದಲ್ಲಿ, ಇಲ್ಲೊಬ್ಬ ಮಹಿಳೆ ಬರೋಬ್ಬರಿ ಮೂರು ಗಂಡು ಮಕ್ಕಳಿಗೆ ಜನ್ಮ ನೀಡಿದ್ದಾಳೆ.
ಜಿಲ್ಲೆಯ ರಾಮಸಮುದ್ರದ ನಿವಾಸಿಯಾಗಿರುವ ಪದ್ಮಾ, ಇಂದು ಮಧ್ಯಾಹ್ನ ಜಿಲ್ಲಾಸ್ಪತ್ರೆಯಲ್ಲಿ ಮೂರು ಮಕ್ಕಳಿಗೆ ಜನ್ಮ ನೀಡಿದ್ದಾರೆ. ಮೊದಲನೆಯ ಹೆರಿಗೆಯಾಗಿ ಬರೊಬ್ಬರಿ 8 ವರ್ಷದ ಬಳಿಕ ಮೂರು ಗಂಡು ಮಕ್ಕಳಿಗೆ ಜನ್ಮ ನೀಡಿರುವುದು ಅಚ್ಚರಿ ಮೂಡಿಸಿದೆ.
ಸದ್ಯ ಮಕ್ಕಳು ಮತ್ತು ತಾಯಿ ನಾಲ್ವರು ಸುರಕ್ಷಿತವಾಗಿದ್ದಾರೆ. ಸರಿಯಾದ ಸಮಯಕ್ಕೆ ಸಿಜೇರಿಯನ್ ಮೂಲಕ ಹೆರಿಗೆ ಮಾಡಿಸುವಲ್ಲಿ ವೈದ್ಯರು ಯಶಸ್ವಿಯಾಗಿದ್ದಾರೆ. ಕಳೆದ ಐದು ದಿನಗಳಿಂದ ರಾಮಸಮುದ್ರ ಆಶಾ ಕಾರ್ಯಕರ್ತೆಯರಾದ ಮುತ್ತಮ್ಮ, ಮಂಗಳಮ್ಮ, ಗೌರಮ್ಮ ಪದ್ಮಾಳನ್ನು, ಜಿಲ್ಲಾಸ್ಪತ್ರೆಗೆ ಕರೆತಂದಿದ್ದರು. ಪದ್ಮಾ ಇಂದು ಮಧ್ಯಾಹ್ನ ಮೂರು ಗಂಡು ಮಕ್ಕಳಿಗೆ ಜನ್ಮ ನೀಡಿದ್ದಾರೆ.
ಕಡು ಬಡತನದಲ್ಲಿರುವ ಪದ್ಮಾ ಕುಟುಂಬ, ಸದ್ಯ ಹೆರಿಗೆಯ ಖರ್ಚು ವೆಚ್ಚ ಭರಿಸಲು ಒದ್ದಾಡುತ್ತಿದೆ. ಇನ್ನೂ ಮೂರು ಮಕ್ಕಳ ಮುಂದಿನ ಲಾಲನೆ, ಪಾಲನೆ ನೆನಪಿಸಿಕೊಂಡು ಪೆಚಾಡುತ್ತಿದೆ. ಪದ್ಮಾ ಮತ್ತು ನಾಗರಾಜ್ ಬೆಂಗಳೂರಲ್ಲಿ ಕೂಲಿ ಕೆಲಸ ಮಾಡಿ ಜೀವನ ನಡೆಸುತ್ತಿದ್ದರು. ಕೊರೊನಾ ಭಯದಿಂದ ಸ್ವಂತ ಗ್ರಾಮ ರಾಮಸಮುದ್ರಕ್ಕೆ ಮರಳಿದ್ದರು.
